Ысык-Атада мүлк талашкандардын бири мыкаачылык менен өлтүрүлгөн
Ысык-Ата районунун Таш-Башат айылында мыкаачылык менен өлтүрүлүп, сөөгү жерге көмүлгөн адамдын өлүмүнө шектүү аныкталды. Чүй ОИИББдин маалымат кызматынан кабарлашкандай, окуя былтыр ноябрь айында катталган.
Маалымдалгандай, 21-ноябрда денесинде ар кандай жаракаттары бар, жерге көмүлгөн 45-50 жаш курактагы белгисиз адамдын сөөгү табылган. Соттук-медициналык эксперттин катышуусу менен жансыз денени кароо учурунда, бычактан алган жаракаттары бар экени аныкталган.
Бул факты боюнча 122-берене (адам өлтүрүү) менен кылмыш иши козголгон.
Териштирүүнүн жүрүшүндө маркум 1974-жылы туулган Д.К. экендиги аныкталган. Ал Бишкек шаардык Октябрь РИИБи тарабынан 2022-жылдын 18-октябрынан бери дайынсыз болуп изделип жаткандыгы такталды.
Узак мөөнөттө жүргүзүлгөн комплекстүү тергөөнүн алкагында кылмышка шектүү катары 1997-жылы туулган Б.Т. аттуу жаран кармалып, убактылуу кармоочу жайга киргизилди. Иликтөөнүн жүрүшүндө бул кылмыш мүлк талашуудан улам келип чыкканы аныкталганын белгилешти милициядан.
