Түркияда жер титирөөдөн бир кыргыз жараны каза болгону айтылды. Элчиликтин маалыматы
Түркияда катталган жер титирөөдөн Кыргызстандын бир жараны каза тапканы айтылды. Бул туурасында "Азаттык" Кыргызстандын Стамбулдагы Башкы консулдугуна шилтеме берип кабарлаган.
Андагы маалыматта, 37 жаштагы кыргызстандык аялдын сөөгү Хатай шаарында кыйраган үйдүн урандыларынын астынан табылганы айтылат. Маркум Түркияда карыяны багып, иштеп жүргөнүн консулдукка иш берүүчү үй-бүлө тастыктаган.
Ал эми Кыргызстандын Түркиядагы элчилигине Хатай шаарында 1986-жылы туулган Кыргыз Республикасынын жараны урандылардын астында калышы мүмкүн деген маалымат келип түшкөн. Мындай маалыматты Kaktus.media сайтына дипломатиялык өкүлчүлүктөн билдиришти.
"Урандылар али тазлана элек, ошондуктан кыргыз жараны деп айта албайбыз. Ал тирүү табылат деп үмүт кылабыз", - дешти элчиликтен.
