Бишкекте менингиттен 1 жашар бала чарчап калды. Министрлик өлүмдүн жагдайларын айтты
Бишкектеги Балдардын клиникалык тез жардам ооруканасында менингококк инфекциясынан бала чарчап калды. Бул тууралуу Kaktus.media сайтына укук коргоо органдарынан билдиришти.
Алардын айтымында, кечээ, 23-февралда бир жаштагы наристе №3 балдар ооруканасына жаткырылган, ага менингококк инфекциясы деген диагноз коюлган.
Наристе ооруканага жеткирилгенден бир нече сааттан кийин чарчап калган.
Окуя боюнча Саламаттыкты сактоо министрлигинен кеңири маалымат беришти.
"Шаардык балдардын клиникалык тез жардам ооруканасынын башкы дарыгери Акылбек Мамановдун берген маалыматы боюнча, 23-февралда саат 17:30дар чамасында 1 жаш 1 айлык А.Э. аттуу наристе оор абалда ооруканага түшкөн", - деп айтылат маалыматта.
Дарыгерлер наристенин абалы оор болгондуктан жандандыруу бөлүмүнөн бокс палатасына которулганын билдиришет.
"Баланын абалынын оордугун эске алып, Республикалык клиникалык инфекциялык оорукананын инфекционисттери шашылыш консультацияга чакырылган. Алар менингококк инфекциясы - жалпыланган түрү, менингококкцемия - оор түрү, сепсистин курчушу, нес абалды, мээнин шишиги жана кандагы тромбоциттер азайган деген диагнозду аныкташкан", - дешет ооруканадан.
Комплекстүү реанимациялык иш-чараларга карабастан бала ооруканага түшкөндөн 6 сааттан кийин, тагыраагы, саат 23:50дө чарчап калган.
Сүрөт иллюстрациялык.
