Апрель революциясынын курмандыктарынын жакындары Бакиевдердин келишине каршы чыгышты
Бүгүн, 4-мартта, "Ак үйдүн" имаратынын жанында жайгашкан 7-апрелде курман болгондордун эстелигинин жанында митинг-реквием болуп, анда 2010-жылдын апрелинде курман болгондордун жана жарадар болгондордун жакындары чогулушту.
Алар курман болгондорду эскерип, куран окушту.
Андан соң алар өз талаптарын айтышып, эң биринчи кезекте - качкын президент Бакиевдин үй-бүлөсүнүн кайтып келишине жана реабилитацияланышына каршы экендиктерин билдиришти.
Ошондой эле алар 7-апрелде Бакиевдердин үй-бүлөсүнө каршы күрөштө курман болгондор тууралуу эскерүү күнүн дем алыш күнү бойдон калтырууну талап кылышты.
Мурдагы Спорт жана жаштар министри Алиясбек Алымкулов мамлекет башчысы Садыр Жапаровдон аны адаштырып жаткандарды укпоону суранды.
"Кыргызстандын жаңы тарыхын кайра жазууга аракет кылбагыла", - дешти чогулгандар.
