Комиссия акыркы 10-20 жылда курулган үйлөрдүн сейсмикалык туруктуулугун текшерет
Кыргызстанда акыркы 10-20 жылда жаңы курулган бардык үйлөрдүн жер титирөөгө туруктуулугун текшерүү үчүн мамлекеттик комиссия түзүлдү. Бул тууралуу "Мир" телеканалына берген маегинде министрлер кабинетинин төрагасы Акылбек Жапаров билдирди.
"Тилекке каршы, бул (биз Түркия менен Сириядагы жер титирөө) акыркы он жылдагы эң чоң трагедиялардын бири болуп калды, көптөгөн курмандыктар болду. Бул трагедиядан улам, өкмөтүбүздүн, мамлекетибиздин башчысы Садыр Нургожоевич Жапаровдун көңүлү курулуш тармагына бурулду",-деп билдирди ал.
Кыргызстанда инженерлер, көзөмөл органдары да бар. Ошого карабастан, мамлекеттик комиссия түзүлүп, ал жер титирөөгө туруктуулук үчүн акыркы 10-20 жылда курулган бардык жаңы үйлөрдү тереңирээк изилдейт.
"Жакында эле өлкөбүздүн Илимдер академиясына шайлоо болуп жаткан учурда өкмөт сейсмологду бул жогорку кадыр-барктуу илимий мекемеге жетекчи кылып алууну сунуш кылды. Өлкөбүздүн 95%дан ашыгын тоолор түзөт. Бизде дээрлик 3000ге жакын майда жер титирөөлөр болуп турат. Коңшу өлкөлөр менен чектеш аймактарда күчү 4,5-5 баллга чейин жер силкинүүлөр катталат. Ошондуктан, биз илимден сунуштарды күтүп, кырсыктардын, анын ичинде жер титирөөлөрдүн жарандарыбызга тийгизген таасирин азайтуу боюнча практикалык чараларды көрө баштадык", - деди Акылбек Жапаров.
