БШК Жаныбек Абировдун депутаттык мандатын алды
Борбордук шайлоо комиссиясы бүгүн, 27-марттагы жыйынында Жогорку Кеңештин депутаты Жаныбек Абировдун ыйгарым укуктарын мөөнөтүнөн мурда токтотту.
Буга чейин Жогорку Кеңештин депутаты Жаныбек Абиров депутаттык мандатын тапшырууга арыз жазганы белгилүү болгон. Ал БШКга тиешелүү арыз жазган.
Эске салсак, 11-мартта Абиров жеке күзөт кызматынын кызматкерин сабап салган. Жабырлануучу баш мээнин жабык жаракаты менен Улуттук госпиталга жаткырылган. Бул окуяга президент Садыр Жапаров реакция жасап, 13-мартта окуяга тиешеси бар эки шектүү милиция тарабынан кармалган.
Абиров социалдык түйүндөр аркылуу кечирим сурап, жоопкерчиликти тартууга даяр экенин билдирген. Көп өтпөй Жогорку Кеңеш Жаныбек Абировдун маселесине байланыштуу комиссия түзүлгөн.
Абиров Ленин бир мандаттуу шайлоо округунан депутат болуп шайланган. Ал "Мекенчил" депутаттык тобуна мүчө болчу.
