ОСАГО: 1-апрелден баштап камсыздандыруусу жок айдоочулар айыпка жыгылат. Бирок баары эмес

1-апрелден тарта бир нече категориядагы автоунаа ээлерине камсыздандыруу (ОСАГО) боюнча документи жок болгондугу үчүн айып пул салынат. Бул тууралуу Министрлер кабинетинин ушул жылдын 24-мартындагы токтомунда айтылат.

Жол кыймылынын мыйзамдары киргизилген өзгөртүүлөргө ылайык, 1-апрелден тарта айдоочулар же төмөнкү транспорт каражаттарынын ээлери ыйгарым укуктуу мамлекеттик органдардын кызматкерлери тарабынан токтотулган учурда жарандык жоопкерчиликти милдеттүү камсыздандыруу келишимин да берүүгө милдеттүү:

• башка өлкөлөрдө катталган транспорт каражаттары;
• юридикалык жактардын, анын ичинде мамлекеттик органдардын жана өз алдынча башкаруу органдарынын менчигинде болгон транспорт каражаттары.

Белгиленгендей, 2024-жылдын 1-январынан тартып ыйгарым укуктуу мамлекеттик органдардын кызматкерлери токтоткондо катталган автоунаалардын башка бардык айдоочулары ОСАГО боюнча документ көрсөтүшү керек.

Эске салсак, бул токтом ОСАГО боюнча мыйзамды ишке ашыруу максатында кабыл алынган. Экономика министрлигинде мурда айтылгандай, бул зарыл, анткени бардык эле жарандар автоунаанын катышуусундагы кырсыктын кесепетинен ден соолугуна же мүлкүнө келтирилген зыяндын ордун толтурууну билишпейт.

"Камсыздандыруу полисинин жоктугу каржылык кыйынчылыктарга жана жабыркаган тарап менен кырсыктын күнөөкөрүнүн ортосундагы соттук териштирүүнүн узакка созулушуна алып келет", - деп айтылат министрликтин маалыматында.

Ошондой эле Экономика министрлиги ОСАГОнун жоктугуна айып пул 3 миң сом болорун кошумчалады. Кийинчерээк Жогорку Кеңештин төрагасы Нурланбек Шакиев автотранспорт каражаттарынын жоопкерчилигин милдеттүү камсыздандыруу полиси жок болсо, айып пулду киргизүү белгисиз мөөнөткө жылдырылганын билдирди. Ошол эле учурда Мамлекеттик каржы көзөмөл органынын камсыздандырууну жөнгө салуу бөлүмүнүн башчысы Тахмина Шадыбекова Kaktus.media сайтына комментарий берип жатып, мамлекеттик агенттикке азырынча эч кандай документтер келе электигин белгиледи.

"ОСАГО жок болгондугу үчүн айып пулдар кайсы күндөн тартып жана качан жоюлат деген суроолорго азырынча жооп берүү мүмкүн эмес, анткени, азырынча көрсөтмө боло элек", - деди ал.

ОСАГО милдеттүү болуп саналат. Транспорт ээлери камсыздандырууну сатып алышы керек. Мыйзам аткарылышы зарыл, аны эч ким жокко чыгарган жок.

Шадыбекова кошумчалагандай, буга чейин ОСАГО камсыздандыруу полисин сатып алгандар кабатыр болбошу керек, анткени ал иштелип чыккан мөөнөткө чейин жарактуу болот.