Акылбек Жапаров Бишкектеги ыш көйгөйүн чечүү жолдорун сунуштады
Министрлер кабинетинин төрагасы Акылбек Жапаров Бишкек шаарынын мэриясында шаардагы жол кыймылынын көбөйүшү, ыш маселесин чечүү жана таштандыларды өз убагында чыгаруу сыяктуу негизги көйгөйлөрдү чечүү боюнча жумушчу кеңешме өткөрдү. Бул тууралуу министрлер кабинетинин басма сөз кызматынан кабарлашты.
Акылбек Жапаров жогорудагы көйгөйлөрдүн ичинен өзгөчө ыш маселесине тийиштүү көңүл бурулбай жатканын белгиледи.
"Кышында бул биринчи маселеге айланат, жаз келээри менен унутуп калабыз. Мындай болбошу керек. Жайында кышка даярдык көрүү зарыл", - деп баса белгилеген Акылбек Жапаров.
Ал төмөнкүдөй тапшырмаларды берди:
- Бишкек шаардык ЖЭБди сапаттуу көмүр менен камсыз кылуу, ошондой эле анын бардык фильтрлерине техникалык аудит жүргүзүү;
- калктуу конуштарды газдаштыруунун финансылык моделин иштеп чыгуу жана 14 күндүн ичинде берүү;
- борборго кирүүчү жеңил унаалардын, анын ичинде оор жүк ташуучу унаалардын саны менен бирге автотранспорттук агымдарга көңүл буруу.
"Ар бир автобуска туура эмес токтотулган унааларды жазуу үчүн видеокамера орнотулушу керек. Бул кадам "Коопсуз шаар" линиясы аркылуу өткөрүлүп, айдоочуларга туура эмес токтоткондугу үчүн айып пул түрүндө берилиши керек", - деп белгиледи министрлер кабинетинин башчысы.
Бул жыйынга катышкан калаа башчысы Эмилбек Абдыкадыров таштандыларды кайра иштетүүчү заводду куруу боюнча келишим түзүлгөнүн, ошондой эле Бишкетин бардык аймагында 18 айланма жол куруу пландалып жатканын айтты.
Акылбек Жапаров сунушталган долбоорлорду колдоого даяр экенин билдирип, бардык аткарыла турган иштердин негизги максаты жарандардын жашоосун жакшыртуу экенин белгиледи.
