Сузакта гектарлаган жердин мыйзамсыз сатылышына шектелип мурдагы айыл башчы кармалды

Сузак районунун Кызыл-Туу айыл өкмөтүнүн мурдагы башчысы УКМК тарабынан кармалды. Коопсуздук комитеттен билдиришкендей, ал Кызыл-Туу айыл аймагындагы жер тилкелерин мыйзамсыз сатканга шектелүүдө.

Белгиленгендей, аталган айылдын жооптуу кызматкерлери "Кадастр" мамлекеттик мекемесинин Сузак райондук филиалынын кызматкерлери менен алдын ала сүйлөшүп алышып, акчалай сыйлык үчүн жасалма токтомдорун пайдалануу менен жеке турак жай куруу үчүн 6 гектардан ашык жер тилкесин мыйзамсыз бөлүп, жер тилкелерине жеке менчик укугу боюнча мамлекеттик актыларды жасап беришкен.

Айыл чарба багытындагы жерлерди мыйзамсыз берүүгө негиз болгон документалдык маалыматтарды аныктоо жана табуу, кошумча далилдерди чогултуу максатында мурдагы айыл өкмөт башчысы К.М.Ы`нын үйүндө тинтүү иштери жүргүзүлдү. Анын жүрүшүндө кылмыш ишине тиешеси бар көп сандагы токтомдор, корутундулар, топографиялык жана башка жасалма документтер табылып алынды, ошондой эле аталган даректе ок атуучу куралдар, травматикалык куралдар жана ок-дарылар мыйзамсыз сакталганы аныкталды.

Учурда УКМКнын Жалал-Абад облусу боюнча башкы башкармалыгынын тергөө бөлүмү тарабынан кызмат адамдарынын кылмыш иштерине тиешеси бар, жогун аныктоо боюнча иш-чаралар жүргүзүлүүдө.