Бишкекте 14 мектеп окуучусунан жана 7 мугалимден коронавирус аныкталды
Бишкек шаарында 1-апрелден тартып 105 окуучу каникулдан кийин мектептерине кайтып келишти. Бул тууралуу бүгүн, 2-апрелде өткөн брифинг учурунда мэриянын билим берүү башкармалыгынын жетекчиси Эльмира Иманалиева билдирди.
Анын айтымында, 14 окуучу жана 7 мугалим коронавирус илдетин жугузуп, учурда дарыланып жатышат. Андан тышкары 3 496 окуучу жана 51 мугалим Курч респиратордук вирустук ооруну жугузушкан.
Балдарын мектепке жиберүүдөн кооптонгон ата-энелер арыз жазып, балдарын үйдөн эле окута алышат, деп Иманалиева эскертти. 1-апрелге карата ушундай билдирүүлөрдөн 1 237 арыз келип түшкөн.
"Баса белгилей кетчү жагдай, мектеп формасын кийүү милдеттүү эмес, бирок балдар таза жана тыкан кийинүүгө тийиш", - деди ал.
Эске салсак, Бишкекте 1-5, 9-, жана 11-класстын окуучулары офлайн форматта окуп жатышат. Ал эми 6,7,8,10-класстар үйлөрүнөн окуп жатышат.
