Окуучулар кабылган кырсык. Жабыркагандардын саны 27ге жетти
"Манас" аэропортунун трассасында жол кырсыгына кабылып, жаракат алган балдардын саны 27ге жетти. Бул туурасында шаардык №3 балдар клиникалык ооруканасынын башкы дарыгери Акылбек Маманов Kaktus.kg сайтына билдирди.
Дарыгердин айтымында, реанимацияга түшкөн 4 окуучунун үчөө эсине келди.
"Жандандыруу бөлүмүндө жаткан балдардын биринин абалы туруктуу оор, үчөө эсине келди. Алар эртең жалпы палатага которулат. Ал эми 9 бала нейрохирургия бөлүмүндө жатат. Кечээ кечинде жана бүгүн, 21-апрелде да кайрылгандар болду. Жалпы 27 бала бар. Абалдары жакшы", - деди Маманов.
Эске салсак, 20-апрелде окуучуларды ташыган автобус кырсыкка кабылып, 18 бала ооруканага жаткырылган. Анын ичинен 4 баланын абалы оор болуп, жандандыруу бөлүмүндө жатканы кабарланган. Калган 14 бала оорукананын башка бөлүмдөрүндө тиешелүү дарыланууну алып башташкан.
