Россия Кыргызстандан сүткө ветеринардык сертификат бербөөнү суранууда. Эмнеге?
Россия тарап Кыргызстандагы сүт заводдорун текшерүү аяктаганга чейин ветеринардык сертификаттарды бербөөнү суранды. Бул тууралуу экономика министринин орун басары Назарбек Малаев Жогорку Кеңештин Агрардык саясат боюнча комитетинин жыйынында билдирди.
Анын айтымында, Россельхознадзордун текшерүүсү Россияга экспорттун кескин көбөйүшүнө байланыштуу башталган.
"Кыргызстан Россия Федерациясына сүт берүүнү көбөйттү. Буга байланыштуу текшерүү башталды. Текшерүү учурунда орус тарап ал аяктаганга чейин сертификаттарды бербөөнү суранууда", - деди ал.
Айыл чарба министринин орун басары Нурдин Алишеров кошумчалагандай, балык жеткирүүгө да чектөөлөр киргизилген.
"10 жеткирүүчүнүн ичинен алтоосунан импортту чектөө чечими кабыл алынды. Төрт жеткирүүчү текшерилип жатат, эки чарбага балык алып келүүгө уруксат берилди. Сүт азыктарын берүүчү 20 ишкана боюнча чечим кабыл алынды. Бүгүнкү күндө анын ичинен 10 ишкананын тиешелүү өкүлдөрү менен айыл чарба министринин орун басары менен жолугушуусу керек болчу", - деди ал.
