Депутат Эдил Байсаловдун үй-бүлөсү бар-жогуна кызыкты
Депутат Жаныбек Кыдыкбаев министрлер кабинетинин төрагасынын орун басары Эдил Байсаловдун үй-бүлөсү бар-жогуна кызыкты. Бул тууралуу ал 28-апрелде Жогорку Кеңештин "Ата Журт Кыргызстан" фракциясы менен "Мекенчил" депутаттык тобунун биргелешкен жыйынында сурады.
Байсалов депутатты жоопсуз калтырды. Буга "Ата-Журт Кыргызстан" партиясынын лидери Бактыбек Сыдыков андан жооп берүүнү өтүндү.
"Суроону түшүнгөн жоксузбу? - деди депутат.
"Түшүнөм, бирок анын ишке кандай тиешеси бар?", - деп сурады Байсалов.
Кыдыкбаев буга чейин анын кесиптештери Глобалдык фонд тарабынан ПРООНго бөлүнгөн акча боюнча маселени көтөрүп, бул каражатты Саламаттыкты сактоо министрлигине жөнөтүүнү сунушташканын айтты.
"Көрсө, сиз бул сунушка каршы чыгып жатыптырсыз. Ошондуктан балдарыңыз барбы деп сурайын дегем", - деди ал.
"Бул маселеге кезек келгенде мен сизге кеңири жооп берем", - деди Байсалов.
Эске салсак, буга чейин депутат Жылдыз Садырбаева Глобалдык фонддун ВИЧ жана кургак учук менен күрөшүүгө бөлүнгөн каражатын бөлүштүрүү маселесин караган комиссияны таратууну талап кылган.
"29 миллион доллар. Биз мынчалык чоң каражаттардын түшүнүксүз бир нерселерге кетишине жол бере албайбыз. Эч ким билбейт. Каражаттын сарпталганы боюнча бир дагы бейөкмөт уюм отчёт бербейт. Мындан тышкары бейөкмөт уюмдар өздөрү каражат бөлүштүрүүгө катышат, өздөрү алышат. Ушул жылдар аралыгында каражаттарды бөлүштүрүү өзүнүн натыйжалуулугун көрсөткөн жок: СПИД жана кургак учук менен ооругандардын саны өсүп жатат. Комитетти таркатып, жаңы арыз берүү керек.
Ар бир адам бул колдонмонун мазмунун билет. Алдын алуу жок, күрөш дагы жок. Биз бир жыныстуу коомдорду, интимдик кызмат көрсөтүүлөрдү жана башкаларды күчөтүп жатабыз. Бул колдонмонун баары ушуга багытталган. Акча эркектер менен жыныстык катнашта болгон эркектердин үзгүлтүксүз форумдарына, ЛГБТ кыймылдарын өнүктүрүүгө кетет", - деген ал.
