Кишини өлтүрүп, сөөгүн жашыруу үчүн сууга ыргытып жиберишкен
Адам өлтүрүүгө шектелип Панфилов районунун эки тургуну кармалды. Бул тууралуу Чүй облустук ички иштер башкы башкармалыгынын басма сөз кызматы билдирди.
26-апрелде Панфилов районунун Жайылма айылында Чоң Чүй каналынан эркек кишинин жансыз денеси табылган. Жабырлануучунун денесинен зордук-зомбулуктун издери табылган.
Аталган факты Панфилов РИИБге катталып, "Адам өлтүрүү" беренеси боюнча кылмыш иши козголгон. Каза болгон адамдын өздүгү такталып, ал Кайыңды шаарындагы Кабельный дачасынын тургуну 1968-жылы туулган В.Х. болгон.
Милиция кызматкерлери тарабынан кылмышка шектүүлөр - 1978-жылы туулган К.Т. жана 1962-жылы туулган Ж.Т. кармалып, убактылуу кармоочу жайга киргизилди.
Маалым болгондой, кылмыш мас абалындагы чырдын негизинде жасалган. Маркумдун сөөгү Бишкектеги Чүй каналына ыргытылган. Учурда бул иш боюнча тергөө иштери уланууда.
