Мадумаров: Комитет "Бүтүн Кыргызстандын" өкмөттү таратуу боюнча чечимин четке какты
Жогорку Кеңештин Конституциялык мыйзамдар, мамлекеттик түзүлүш, сот-укуктук маселелер жана регламент боюнча комитети "Бүтүн Кыргызстан" фракциясынын министрлер кабинетин отставкага кетирүү боюнча сунушун четке какты. Бул тууралуу 3-майда парламент жыйынында фракция лидери Адахан Мадумаров билдирди.
Ал белгилегендей, "Ата Журт Кыргызстан" фракциясы Атыр Абдрахматованы акыйкатчы кызматынан алууну сунуштаганда профилдик комитет фракциянын чечимин колдогон.
"Биздин фракция министрлер кабинетин Конституциянын 44-беренесине ылайык келбегендиктен отставкага кетирүү сунушун киргизгенде, комитет каршы болгон. Мындай чечимди кабыл алгандар трибунага чыксын, аларга бир нече суроом бар. Эмненин негизинде чечим кабыл алышты, эмне үчүн "Бүтүн Кыргызстандын" сунушун четке какты?", - деп сурады Мадумаров.
Жогорку Кеңештин төрагасы Нурланбек Шакиев "депутаттардын баары билимдүү, ошондуктан алар парламентке шайланышты" деп жооп берди.
"Жөн эле баарын сындап, өзүнөн чыгаруунун кереги жок. Сиз мүчө болгон эл аралык комитеттен башка жыйындарына катышпайсыз, анан сыртка чыгып ушундай акылдуу сөздөрдү айтасыз", - деп кошумчалады ал.
"Жыйын жабык өттү. Мен чакырылган бардык жыйындарга катышам. Ал эми жыйын Өзбекстандагы референдумга байкоочу болуп жаткан кезде болгон. Сиз спикер катары бул тууралуу билишиңиз керек? Сөзүңүздү артка кайтарыңыз! Мен Ташкентте отуруп, кантип комитеттин жыйынына катышмак элем?", - деди Мадумаров.
