Билим берүү министрлиги жарандарга үйүндө бала бакча ачууга уруксат берүүнү сунуштоодо
Билим берүү жана илим министрлиги бала бакчаларды үйлөрдө ачууну сунуштоодо.
Коомдук талкууга жарыяланган Министрлер кабинетинин токтомунун долбооруна ылайык, патенттин негизинде ишкердик менен алектенген жеке жактар мектепке чейинки билим берүү кызматын турак жайда көрсөтүүгө укуктуу. Имараттар мектепке чейинки билим берүү уюмдарында балдардын болушу үчүн шарттардын коопсуздугун жана өрт коопсуздугун камсыз кылуу боюнча минималдуу санитардык талаптарга жооп бериши керек.
Турак-жайларда мектепке чейинки билим берүү кызматын көрсөткөндөр электр энергиясы үчүн тарифти калкка көрсөтүлгөн өлчөм менен төлөй турганы белгиленген.
Мындан тышкары демилгечи "Кепилдик фонду" ААКсына коммерциялык банктардан жеңилдетилген каржылоону алуу үчүн турак жайларда мектепке чейинки билим берүү кызматтарын көрсөткөн жеке ишкерлерге 300 миң сомго чейин кепилдик берүүнү кароону сунуштоодо.
Буга ылайык, Экономика жана соода министрлигине Мамлекеттик салык кызматы менен бирдикте төмөндөгү чараларды көрүү сунушталды:
- мектепке чейинки билим берүү кызматтарын көрсөтүүчү жеке ишкерлер катары жеке жактарды каттоонун жөнөкөйлөтүлгөн тартибин камсыз кылуу;
- бирдиктүү салык декларациясын 2023-жылдын 1-декабрына чейин мектепке чейинки билим берүү кызматтарын көрсөткөн жеке ишкерлер тарабынан толтурулган арыз менен толуктоо.
Санариптик өнүктүрүү министрлиги, Мамлекеттик кызмат жана жергиликтүү өз алдынча башкаруу иштери боюнча мамлекеттик агенттиги, жергиликтүү өз алдынча башкаруу органдары "Инфоком" ишканасынын колдоосу менен төмөнкүлөр боюнча чараларды көрсүн:
- "Санарип аймак" системасына Кыргыз Республикасынын жарандарын жашаган жери боюнча каттоо жана турак жайды ижарага алуу жөнүндө маалыматтарды киргизүү;
- мектепке чейинки билим берүү кызматтарын көрсөтүүчү жеке ишкер катары каттоону каалаган жеке жактарга алардын иш жүзүндө жашаган жерин жана иштеген жерин тастыктаган документтерди алууга көмөктөшүү.
