Тинтүү учурунда сабалган милициялардын окуясы. УКМК кандай товар алынганын айтты
Баткенде аткезчилик жүктөрдү жашырууга аракет кылган жарандар милиция менен УКМКнын кызматкерлерине кол салып, анын кесепетинен 2 милиция ооруканага түшкөнү кабарланган.
Бул окуя боюнча УКМКнын маалымат кызматынан кошумча маалымат берип, тинтүү учурунда баасы 1,8 млн сомду түзгөн товар алынганын кабарлады.
Белгилүү болгондой, козголгон кылмыш ишинин алкагында 9-майда Баткен районунун Кара-Бак айылынын жашоочусунун үйүндө тинтүү жүргүзүлгөн. Анда коңшу өлкөдөн аткезчилик жол менен алып келинген акциздик маркасы жок 18 миң пачка тамеки алынган. Товардын баасы 1 млн 800 миң сомду түзөт.
Бул факты боюнча "Бийлик өкүлдөрүнө карата зомбулук жасоо же коркунуч келтирүү" беренеси менен иш козголуп, Кара-Бак айылынын 3 тургуну убактылуу кармоочу жайга киргизилди.
УКМК контрабанда менен алектенгендер, кылмышка тиешеси бар адамдар статусуна, ээлеген кызмат ордуна карабастан мыйзам чегинде жоопко тартыларын эскертет.
