Акыйкатчы кызматына Аскат Азарбековдун талапкерлиги көрсөтүлдү
Акыйкатчы институтунун жамааты Кыргызстандын акыйкатчы кызматына институттун аппарат жетекчиси Аскат Азарбековдун талапкерлигин көрсөтүштү. Бул тууралуу Kaktus.media сайтына өздүк булактар билдирди.
Катка 57 кызматкер кол коюп, талапкерди колдоо жана шайлоого катышуу өтүнүчү менен бардык парламенттик фракцияларга жана топторго жөнөтүшкөн.
Кызматкерлердин айтымында, аппарат жетекчиси институттун ишине чоң салым кошкон. Катта анын экс-акыйкатчы Атыр Абдрахматова менен чатагы бар экени да айтылган. Бир нече долбоорлорду уюштуруп, эл аралык багытта жигердүү иш алып барганы тизмектелген.
Буга чейин "Ишеним" фракциясы Канымбү Карабаеваны талапкер көрсөтсө, экс-депутат Мирлан Жеенчороев талапкер болуудан баш тартканы белгилүү болгон. Ошондой эле "Ата-Журт Кыргызстан" фракциясы башкы прокурордун мурдагы орун басары Жамиля Жаманбаеваны талапкер көрсөткөн.
