Токмокто ата-энелер балдары сабалганын айтышкан. Милиция 3 шектүүнү кармады
Токмок шаарында массалык мушташ катталып, аны уюштурган деген шек менен 3 бала кармалды. Чүй ОИИББдин маалыматына караганда, окуя 11-майда катталган.
12-майда Токмок ШИИБине Алга айылынын тургуну арыз менен кайрылган. Ал 11-май күнү болжол менен саат 20:00 чамасында Токмок шаарынын № 1 кичи районунда 2007-жылы туулган Н.А. аттуу баласын белгисиз адамдар уруп, сабаганын айткан. Андан тышкары дагы эки тургун балдары сабалганын айтып арызданышкан.
Аталган фактылар каттоого алынып, 280-беренеси (бейбаштык) менен кылмыш иши козголуп, тергөө амалдары башталган.
Жүргүзүлгөн иш-чаралардын натыйжасында массалык мушташты уюштурууга жана ага катышууга шектелип 2005-жылы туулган Ж.Ш., К.И. жана 2007-жылы туулган А.М. аттуу балдар кармалып, убактылуу кармоочу жайына киргизилди.
Бүгүнкү күндө тергөө амалдары уланууда.
Башкы беттеги сүрөт иллюстрациялык.
