Кадыр Кошалиев Аскар Акаев менен маек курду. Мурунку президент эмне деди?
Кадыр Кошалиев экс-президент Аскар Акаев менен маек курду.
Анын айтымында, маек былтыр ноябрда Москвада тартылган. Маекти УТРКнын "Кыргыз ааламы" программасынын 23-чыгарылышынын алкагында чыгаруу пландалган. Бирок интервью Demilgecomkg YouTube каналга жарыяланды.
Кошалиевдин айтымында, ал жаңы жылдын алдында "Кыргыз ааламы" программасынын алкагында өлкөнүн мурдагы жетекчилери менен бир катар маектерди өткөрүүнү сунуштаган. Январдын башында Москвада Аскар Акаев менен жолугуп, апрель айында Минскиде Бакиевден интервью алган. Алып баруучунун айтымында, ал башка мурдагы жетекчилерге интервью алуу сунушун жөнөткөн.
Акаев менен болгон интервью дээрлик 50 мүнөткө созулат. Суроолордун көбү Аскар Акаевдин жеке жашоосу, илимий ишмердүүлүгү, балалык, жаштык кезиндеги эскерүүлөргө байланыштуу. Акаевдин президенттигинин алгачкы жылдарындагы эскерүүлөрүнө бир топ убакыт бөлүнөт. Акаев менен Кошалиев 1990-жылдардын башындагы окуяларды, улуттук валютаны жүгүртүүгө киргизүү, Чыңгыз Айтматовдун Ысык-Көл форумун өткөрүү, өкмөттү түзүү, Кытай менен чек ара маселелерин чечүү, "Манас" эпосунун 1000 жылдык мааракесин белгилөө жана башка окуяларды талкуулашкан.
Акаев менен Кошалиев Кыргызстандын акыркы айлардагы саясий күн тартибиндеги маселелерди дээрлик козгошпойт. Аскар Акаев дүйнөлүк күн тартибине токтолуп, Кыргызстанда азыр экономикалык жылыш үчүн мүмкүнчүлүк бар экенин айткан.
"Биз кризистик мезгилде жашап жатабыз. Мындай цивилизациялык кризистер 500-1000 жылда бир болуп турат. Акыркы 20-30 жылдан бери ушундай цивилизациялык кризис доорунда жашап жатабыз. Бул бизге окшогон чакан мамлекеттер үчүн жакшы мүмкүнчүлүк. Бурулуш жасайбыз, эгер эл ынтымактуу болсо жана туура жолду тапса, биз, мисалы Түштүк Корея сыяктуу көтөрүлө алабыз", - деген Акаев.
Сөзүнүн аягында А.Акаев саясатка аралашып, президент болуу ниети жок болгонун, бирок мындай мүмкүнчүлүккө ыраазы экенин билдирди.
"Терең ыраазычылыгымды билдирем. Менин бактыма ушул нерсе жазылган экен. 1990-жылдардын башында эл мени биринчи президент кылып шайлап, чоң ишеним көрсөттү. Мен болгон күчүмдү, билимимди жумшаганга аракет кылдым. Эл өзү баасын берет", - деген.
Эске салсак, Кадыр Кошалиев "Кыргыз жолу" коомдук уюмунун төрагасы, Элдик Курултайдын идеясынын авторлорунун бири жана Конституцияны иштеп чыгууга активдүү катышкан. Жакында анын Курманбек Бакиев менен болгон маеги YouTube каналга жарыяланды. Интервью резонанс жаратып, мамлекеттик каналдын жана Кадыр Кошалиевдин өзүнө карата сындарды жаратты. Бирок телеканал интервью жетекчилик менен макулдашылган эмес деп билдирди. Ал эми Эдил Байсалов журналист өз каалоосу боюнча респонденттерден интервью алууга укуктуу, ал эми Курманбек Бакиев да сөз сүйлөөгө укуктуу деп эсептеди.
Курманбек Бакиев сыртынан 30 жылга эркинен ажыратылып, расмий издөөдө жүргөн. Учурда Минск шаарында жашайт. Республиканын мурдагы жетекчилеринин Дубайдагы жолугушуусуна чакырылганына караганда, качкын президент азыркы бийлик менен байланышта.
