Бир мандаттуу шайлоо. Ленин районунда шайлоо тилкесинен тышкары добуш берүү башталды
Бүгүн, 27-майда №26 Ленин бир мандаттуу шайлоо округу боюнча Жогорку Кеңешинин депутатын мөөнөтүнөн мурда шайлоонун шайлоо тилкесинен тышкары добуш берүү жүрүп жатат.
Мөөнөтүнөн мурда шайлоого имараттан тышкары добуш берүү мүмкүнчүлүгүн берүү үчүн 97 арыз түшкөн. Алар:
- кары-картаңдар - 5;
- майыптыгы барлар - 28;
- ден соолугуна байланыштуу - 41;
- жеке категориялар - 23.
"Кыргыз Республикасынын президентин жана Жогорку Кеңешинин депутаттарын шайлоо жөнүндө" Кыргыз Республикасынын Конституциялык мыйзамынын 33-беренесине ылайык, шайлоочулардын тизмесине киргизилген, бирок ден соолугуна же майыптыгына байланыштуу шайлоочулар добуш берүү үчүн шайлоо участогуна келе албаса шайлоо участогунан тышкары добуш берүүгө укуктуу. Ошондой эле:
- добуш берүү күнү ооруканаларда, камакта жаткан шайлоочулар;
- убактылуу жашаган жери алыскы жана жетүүгө кыйын аймактардагы шайлоочулар.
Өзгөчө учурларда тиешелүү шайлоо комиссиясынын чечими боюнча:
- калктуу пункттардан алыс, обочолонгон жерлерде жайгашкан аскер бөлүктөрүндө добуш берүү күнү кызмат өтөп жаткан аскер кызматчылары;
- шайлоо күнү кызмат өтөп жаткан ички иштер органдарынын кызматкерлери,
- үзгүлтүксүз иш цикли бар ишканаларда иштеген шайлоочулар,
- ротациялык негизде иштеген шайлоочулар.
Шайлоо участогунан тышкары добуш берүү бир күн мурда шайлоочунун жазуу жүзүндөгү арызынын негизинде гана өткөрүлөт.
