Медайымдык жана акушердик иш багыттары боюнча бакалавр, магистр программалары киргизилет
"Медайымдык иш" жана "акушердик иш" багыттары боюнча бакалавриат жана магистратура программалары киргизилет. Бул туурасында Министрлер кабинетинин 29-майдагы кезектеги отурумунда белгилүү болду.
Акылбек Жапаровдун төрагалыгы алдында өткөн отурумда жалпы 15 маселе каралды. Алардын бири - "Кыргыз Республикасында жогорку кесиптик билим берүүнүн эки деңгээлдүү түзүмүн белгилөө жөнүндө" токтомуна өзгөртүүлөр киргизилди.
Ага ылайык, "медайымдык иш" жана "акушердик иш" багыттары боюнча бакалавриат программаларын киргизүү пландаштырылууда, окуу мөөнөтү 4 жылды түзөт. Окууну аяктаган соң, медайымдык иш боюнча бакалавр, акушердик иш боюнча бакалавр квалификациясы ыйгарылат.
Башкы беттеги сүрөт иллюстрациялык: Майлуу-Суу медициналык колледжинин баракчасынан алынды.
