Төңкөрүш аракети. Кармалгандардын арасында УКМКнын мурдагы кызматкери жана профессор бар
Эсиңизде болсо, Бишкекте мамлекеттик төңкөрүш жасоо аракети боюнча массалык камакка алуулар уюштурулган. Шектүүлөрдүн арасында атайын кызматтын мурдагы кызматкери жана Кыргыз улуттук университетинин профессору да бар. Бул тууралуу Kaktus.media сайтына укук коргоо органдарынан билдиришти.
Алардын айтымында, 7-июнда Бишкектин Биринчи Май райондук соту бийликти күч менен басып алууга даярданган деген шек менен кармалгандарга карата баш коргоо чарасын тандап, төрт шектүүнү УКМКнын СИЗОсуна 21-июнга чейин жөнөтүү чечимин чыгарган. Буга ылайык, "Элдик Кеңеш" партиясынын жетекчиси Роза Нурматова менен "Чек ара" бейөкмөт уюмунун мүчөсү Гүлжигит Исаков УКМКнын СИЗОсунда. Кармалган дагы эки адамдын аты-жөнүн Улуттук коопсуздук боюнча мамлекеттик комитети ачыктаган жок.
Бирок УКМКнын мурдагы кызматкери Темирлан Дадиев (УКМКнын СИЗОсунда) жана КУУнун профессору Чолпонбек Сыдыкбаев (үй камагында) дагы шектүү деп билдирди булактар.
Эске салсак, Улуттук коопсуздук мамлекеттик комитети "бийликти күч менен басып алуу максатында массалык баш аламандыктарды пландаган адамдар" кармалганын маалымдаган. Андагы атайын операция убагында отуздан ашык адам кармалып, негизги уюштуруучусу катары "Элдик Кеңеш" саясий партиясынын төрагасы менен анын негизги шериктери күнөөсүн мойнуна алышканы айтылган.
