Депутаттар Эдил Байсаловдун отставкасын талап кылышты
Жогорку Кеңештин депутаттары министрлер кабинетинин төрагасынын орун басары Эдил Байсаловдун билдирүүсүнө нааразы. Парламенттин 21-июндагы жыйынында Мирлан Самойкожо президенттин Жогорку Кеңештеги өкүлү Алмасбек Абытовго кайрылып, Жогорку Кеңеш эмне экенин жана Конституцияга ылайык, депутаттарга кандай функциялар жүктөлөрүн айтып берүүнү суранды.
"Депутаттар кимдин атынан сүйлөй алат жана сүйлөй албайт? Бизди ким шайлады, кандай укуктарыбыз бар?" - ал сурады.
Спикер Нурланбек Шакиев белгилегендей, Байсаловдун социалдык комитеттин жыйынында жана жыйындан кийинки сөздөрүнө баа берилет.
"Биз бул маселени көңүл сыртында калтырбайбыз. Мен министрлер кабинетинин башчысы Акылбек Үсөнбекович менен сүйлөшүп, конкреттүү талап, эскертүүлөрдү бердим. Бул биринчи жолу эмес. Министрлер кабинетинин төрагасынын орун басары бийликтин мыйзам чыгаруу жана аткаруу бутактарынын ортосунда чоң жарака кетирип, ойлонулбаган сөздөрү үчүн тартипке чакырылышы керектигин айттым. Мен бүгүн мен президент менен сүйлөшөм. Парламенттин аброюна жана кадыр-баркына шек келтирген сөздөрдү айтууга министрлер кабинетинин жетекчилиги да, анын мүчөлөрү да укугу жок. Биз жол бербейбиз. Жогорку Кеңеш Министрлер Кабинетине талап коюп, анын аткарылышын сураганга укуктуу. Байсаловго байланыштуу маселени карайбыз. Керек болсо анын кызматка ылайыктуулугун талкуулайбыз. Убакыт келди деп ойлойм"
, - деди ал.Абытов өз кезегинде элдин атынан сүйлөөгө депутаттар дагы, президент дагы укуктуу экенин белгиледи.
Айбек Осмонов да Эдил Байсалов билдирүүсү үчүн жооп берсин деген пикирин айтты. Ал эми Эрулан Кокулов Байсаловдун отставкасын талап кыларын, бул маселени президент менен талкуулоону өтүндү.
Эске салсак, Байсалов 20-июнда Министрлер кабинетин түзгөн президент элдин атынан сүйлөй аларын, парламенттин чечимдери кеңеш берүүчү мүнөздө экенин айткан.
