Кызыл-Кыяда базардын аймагынан эркек кишинин сөөгү табылды. Шектүү мурда соттолгон
Баткенде 42 жаштагы кишинин жансыз денеси базардын четинен табылды. Облустук милициядан шектүү изи сууй электе кармалганын билдиришти.
Кызыл-Кыя ШИИБдин нөөмөт бөлүмүнө 5-июль күнү саат 20:20 чамасында Кызыл-Кыя шаарындагы "Таштемир-Ажы" базарында белгисиз жарандын жансыз денеси жаткандыгы тууралуу кабар түшкөн.
Бул маалымат Кылмыштардын бирдиктүү реестрине катталып, тергөөгө чейинки текшерүү иштери башталган.
Маркумдун сөөгү базардын күн чыгыш тарабындагы Сухой-Сай тилкесинде эч ким жашабаган, кароосуз калган үйдөн табылып, денесинде жаракаты бар экендиги аныкталган. Каза болгон киши Ноокат районунун 42 жаштагы тургуну С.Р. болгон.
Аталган факты боюнча соттук-медициналык экспертизалар дайындалып, 122-берененин (Адам өлтүрүү) негизинде кылмыш иши козголгон. Ошол эле күнү кылмышка шектүү катары мурда сот жообуна тартылган Кадамжай районунун Исхак-Полотхан айыл аймагынын тургуну 49 жаштагы Т.Т. Кызыл-Кыя шаарынан кармалды.
Учурда кылмышка шектүү убактылуу кармоочу жайга киргизилип, тергөө иштери уланууда.
