"Унаа" мекемесинде жүк ташуучу унааларды ташуу боюнча коррупциялык схема аныкталды
"Унаа" мамлекеттик мекемесинин аймактык кызматкерлерине карата кылмыш иши козголду. УКМКнын маалыматында айтылгандай, кызматкерлер жасалма бажы документтерин берүү менен импорттук жана бажылык тариздөө боюнча мыйзамсыз канал түзүшкөн.
Кылмыш-жаза кодексинин 337-беренесинин 2-бөлүмү ("Кызмат абалын кыянаттык менен пайдалануу") менен кылмыш иши козголду.
"Унаа" мамлекеттик мекемесинин түзүмдүк бөлүмдөрүндө жүк ташуучу унааларды мыйзамсыз алып келүү жана бажылык тариздөө боюнча коррупциялык схема аныкталды. Мекеменин аймактар аралык секторунун кызматкерлери материалдык кызыкчылыктарды көздөп, кылмыштуу сүйлөшүүлөргө барып, мамлекеттик бюджетке өзгөчө ири өлчөмдө зыян келтирүүгө алып келген. Алар ЕАЭБге мүчө өлкөлөрдүн жасалма бажы документтерин берүү менен импорттук жана бажылык тариздөө боюнча мыйзамсыз канал түзүшкөн.
Тактап айтканда, "Унаа" мамлекеттик мекемесинин аймактар аралык секторунун кызматкерлери тарабынан Казакстан Республикасынын Мамлекеттик бажы декларациясынын негизинде 2009-жылы чыгарылган "Вольво ФН480" үлгүсүндөгү жүк ташуучу унаа катталган. Улуттук банктын курсу боюнча ЕАЭБдин бирдиктүү бажы тарифинде белгиленген 16000 доллардын (1 миллион 400 сом) ордуна Мамлекеттик бажы декларациясынын маалыматы боюнча, бажы алымынын суммасы 1230 долларды (105 850 сом) түзгөн.
Ошол эле учурда 2022-жылдын январынан майына чейинки мезгилде эле аталган коррупциялык схема менен Кыргыз Республикасынын аймагына 300дөн ашык жүк ташуучу унаа алып келинип, каттоодон өткөн.
Учурда иштин жагдайларын, кызмат адамдарынын катышуусун, келтирилген зыяндын көлөмүн аныктоого багытталган ыкчам иликтөө иш-чаралары жүргүзүлүүдө.
Башкы беттеги сүрөт иллюстрациялык.
