Чүй каналына ыргытылган жигиттин сөөгү бир нече күндөн кийин табылды
Токмокто уурдалган 20 жаштагы жигиттин сөөгү Чоң Чүй каналынан табылды. Кылмышка шектелип 3 адам кармалып, СИЗОго киргизилди. Бул туурасында Чүй ОИИББден kaktus.kg сайтына билдиришти.
Такталгандай, 4-июлда Токмок ШИИБге 1988-жылы туулган жаран арыз менен кайрылган. Ал 4-июлга караган түнү 2003-жылы туулган иниси үйүнөн чыгып кеткен бойдон дайынсыз болуп жатканын айткан.
Аталган факты Токмок ШИИБге катталган. Тергөө-ыкчам тобу тарабынан окуя болгон жерге кароо жүргүзүү учурунда далил буюмдар табылып, Тергөө кызматы тарабынан 165-беренесинде көрсөтүлгөн (адам уурдоо) кылмыштын белгилери менен кылмыш иши козголуп, соттук-укуктук экспертизалар дайындалган.
Тергөөнүн жүрүшүндө 1988, 1983 жана 1996-жылы туулган жарандар шектүү катары кармалган. Алдын ала алынган маалымат боюнча, шектүүлөр жабырлануучу жаранды ортодо чыккан уруштан улам үйүнөн алып чыгып, уруп-сабап, андан кийин колун жоолук менен байлап Чоң Чүй каналына ыргытып салышкан. Кармалгандар эки айга СИЗОго киргизилди.
Ал эми маркумдун сөөгү бүгүн, 10-июлда табылды. ӨКМнын маалыматына караганда, издөө иштерине 49 куткаруучу тартылып, саат 11:40 чамасында Алга жана Кошой айылынын ортосундагы көпүрөнүн астынан жигиттин сөөгү табылды.
