Шайлоого катышпагандарга айып салуу сунушталды
Депутат Тазабек Икрамов республиканын аймагындагы шайлоого катышпагандарга айып пул салууну сунуштады. Тиешелүү токтомдун долбоору парламенттин сайтында коомдук талкууга коюлду.
Документке ылайык, жүйөлүү себептери бар адамдар шайлоого катышпаса болот.
Демилгечи Бишкектин Ленин бир мандаттуу шайлоо округу боюнча шайлоого 15,5 миллион сомго жакын каражат сарпталганын белгилеп, бирок шайлоого катталган 124 908 шайлоочунун 17 423ү гана добуш берип, 13,95%ды түзгөнүн билдирген.
Тазабек Икрамовдун айтымында, көптөгөн өлкөлөрдө жүйөлүү себепсиз шайлоого катышпай калган жарандарды жоопкерчиликке тартуу практикасы бар жана бул шайлоочулардын шайлоого катышуусун камсыздайт.
"Шайлоочулардын көпчүлүгүнүн шайлоого катышпай калышынын кесепеттери Кыргыз Республикасынын Конституциясында бекитилген демократиянын негизги принцибинин бузулушуна жана республикалык бюджеттин каражаттарынын негизсиз ысырап болушуна алып келиши мүмкүн. Буга байланыштуу учурдагы мыйзамдарга өзгөртүү киргизүү зарыл", - деп белгилейт депутат.
Ал жүйөлүү себептери бар адамдарды кошпогондо, Кыргызстандын аймагында жашаган кыргыз жарандары президентти жана Жогорку Кеңештин депутаттарын шайлоого катышууга милдеттүү экенин белгилөөнү сунуштайт.
Шайлоого катышуу боюнча милдеттенмелерди аткарбоо жеке жактарга эсептик көрсөткүчтүн 50 өлчөмүндө (5 миң сом) айып салууга алып келет.
Башкы беттеги сүрөт иллюстрациялык.
