Тууганынын паспорту менен Россиянын аймагында жашынып жүргөн кримавторитет кармалды
Мамлекеттер аралык издөөдө жүргөн кыргыз жараны Москвада тууганынын паспортун колдонуп жүргөнү аныкталды. ИИМдин маалыматына караганда, кармалган жаранга 8 жыл мурда издөө жарыяланган.
Кылмыш жасап, 8 жылдан ашык убакыттан бери издөөдө жүргөн жаран 20-июлда Москва шаарында кармалды. Ал мурда бир нече жолу соттолгон жана крим чөйрөдө аты бар Баткен облусунун 1983-жылы туулган Б.С. аттуу тургуну.
Ага карата 2015-жылдын март айында Ош облусунун Араван РИИБи тарабынан Кылмыш-жаза кодексинин 123-беренесинин 2-бөлүгү (адам уурдоо), 125-беренесинин 2-бөлүгү (мыйзамсыз эркинен ажыратуу), 170-беренесинин 2-бөлүгү (опузалап талап кылуу) менен иш козголуп, июнь айында мамлекеттер аралык издөө жарыяланган.
Шектүү жаран 8 жылдан бери Москва шаарынын аймагында тууганынын паспортун пайдаланып жашынып жүргөнү аныкталган.
Кылмыш тууралуу:
Ал 2009-жылдын жай айларында Ош облусунун Араван районунун аймагында анын шериктери – криминалдык элементтер менен бирге курал колдонуп, 33 жаштагы жаранды күч менен унаага салып, алып кетишкен. Жабырлануучуну тоолуу аймакта, андан кийин Бишкек шаарында мыйзамсыз кармап, зордук-зомбулук көрсөтүп, ири өлчөмдөгү 100 миң долларын талап кылып алышкан.
Жабырлануучу бир нече жылдан кийин ички иштер органдарына кайрылган. Кылмыштын башка шериктери мурда кармалып, сот жообуна тартылышкан. Учурда Б.С`ны экстрадициялоо маселеси 1993-жылкы Минск конвенциясына ылайык чечилүүдө.
