Оштогу айланма жолдун сапаты текшерилип, 2,5 млн сомдон ашык зыян келтирилгени аныкталды
Жолдун сапатсыз курулушу боюнча №21 жол тейлөө ишканасынын башкы инженери кармалды. Башкы прокуратуранын маалыматына караганда, кызматкерге 3 берене менен кылмыш иши козголду.
Белгилүү болгондой, Транспорттук прокуратура жана Ош облустук прокуратурасынын жумушчу тобу тарабынан Ош шаарынын түндүк тарабынан айланып өтүүчү мамлекеттик маанидеги Ош айланма жолунун 12-17 чакырымында ("Т-түрүндөгү" кесилиштен тартып Ош-Кара-Суу автожолуна чейин) асфальт-бетон төшөөнүн сапатына, ишти аткарууда мыйзамдардын сакталышына текшерүү жүргүзүлдү.
Текшерүүдө "Кыргызавтожол" мамлекеттик ишканасынын №21 жол тейлөө ишкананын, Жол чарба департаментинин №5 регионалдык бөлүмүнүн жана "В.С.Л." ЖЧКнын кызмат адамдары тарабынан 2021-жылы жана 2023-жылы аткарылган иштерди кабыл алуу актыларына иш жүзүндө төшөлбөгөн асфальт-бетонду, ошондой эле аткарылбаган иштерди жогорулатылган баада киргизишкендиги аныкталган. Жол иштери сапатсыз аткарылгандыктан айрым жол катмарлары деформацияланып кеткен.
Натыйжада мамлекетке жалпы 2 млн 683 миң 786 сом зыян келтирилген.
Аталган факты боюнча Ош облустук прокуратурасы тарабынан 337-берене ("Кызмат абалынан кыянаттык менен пайдалануу"), 210-берене ("Ишенип берилген мүлктү ыйгарып алуу же коротуу") жана 346-берене ("Кызматтык жасалмачылык") менен кылмыш иш козголду.
Тергөөнүн жүрүшүндө №21 жол тейлөө ишканасынын башкы инженери М.М. шектүү катары кармалып, убактылуу кармоо изоляторуна киргизилди. Учурда тергөө аракеттери улантылууда.
