Москвага учкучсуз учактын чабуулунан Москва-Сити мунаралары жабыркады
Москванын мэри Сергей Собянин 30-июлга караган түнү шаарга украиналык учкучсуз учактар чабуул жасаганын билдирди. "Шаардын эки кеңсе мунарасынын фасаддары бир аз жабыркаган. Жабыркаган жарандар жок", - деп жазды Собянин өзүнүн Telegram каналында.
Өзгөчө кырдаалдар кызматы Око-2 мунарасындагы жардыруудан бир күзөтчү жабыркаганын кабарлады. Имараттын өзүндө биринчи кабаттан төртүнчү кабатка чейин айнектер сынган.
Россиянын Коргоо министрлиги Москвага кол салууга үч учкучсуз учак катышканын билдирди. Аба чабуулунан коргонуу күчтөрү Москва облусунун Одинцово районунун аймагында абада учкучсуз учактардын бирин жок кылышты. "Дагы эки учкучсуз учак электрондук согуштун натыйжасында басылып, башкарууну жоготуп, "Москва-Сити" турак-жай эмес курулуш комплексинин аймагына кулап түшкөн", - деп билдирди министрлик.
Чабуул жасалган аймакта учкучсуз учактар кыймылды убактылуу тосту. Окуянын фонунда Москванын Внуково аэропорту учуп-конуу үчүн жабылды. Аэропорт "техникалык себептерден" чектөө киргизгенин, бирок таңкы саат беште алар токтотулганын, азыр аэропорт штаттык режимде иштеп жатканын билдирди.
