Түптөгү сел жүргөн айылдарга өзгөчө кырдаал режими киргизилди
Ысык-Көл облусунун Түп районундагы Байзак жана Кең-Суу айылдарында 2-августта сел жүрүп, үйлөрдү, короолоду суу каптаган. Түзүлгөн кырдаалды тактоо, адамдардын өмүрүн сактоо, авариялык куткаруу жана башка кечиктирилгис иш-чараларды өз убагында аткаруу максатында айыл аймагынын башчысынын буйругу менен бүгүн, 3-августта айылдарга өзгөчө кырдаал режими киргизилди.
Өзгөчө кырдаалдар министрлигинен кабарлашкандай, сел суулары каптаган 38 үйдү тазалоого 3 мотопомпа, 1 өрт өчүрүүчү унаа тартылган. Мындан сырткары авариялык куткаруу автоунаасы, 1 грейдер, 1 жүктөгүч, 3 экскаватор жеринде тазалоо жумуштарын жүргүзүүдө.
ӨКМнын Ысык-Көл облустук башкармалыгынын райондорунан 62 аскер кызматкер жана жергиликтүү жарандык коргонуу кызматынан 50 адам тазалоо иштерине чыгышкан. Буга кошумча 2 аценизатордук унаа, 80 аскер кызматкери тартылган.
