Жалал-Абадда топ балдардын мушташы эмнеден келип чыккан? Милициянын маалыматы
Жалал-Абад шаарында түн ичинде топ балдар мушташып жаткан видео социалдык тармактарга тарады. Анда 2 жигитти сабап кеткен айтылган.
ИИМдин маалымат кызматынан билдиришкендей, окуя 8-августта Жалал-Абад шаарынын Спутник кичи районунда болгон.
Бул факты Жалал-Абад ШИИБдин маалыматтарды каттоо журналына катталып, мушташкан жарандардын аты-жөнү аныкталды. Текшерүүнүн жүрүшүндө ооруканага жана ички иштер бөлүмүнө эч кимиси кайрылган эмес, ошондой эле бири-бирине доо арыз жазуудан баш тартышты.
Жалал-Абад облустук ички иштер башкармалыгынан Kaktus.kg сайтына окуянын чоо-жайын айтып беришти.
Алдын ала текшерүү учурунда Базар-Коргон районунун 18 жаштагы Б.Р. жана А.К. жана 24 жаштагы Б.Р. аттуу жашоочулары Спутник кичи шаарчасындагы СИЗОнун имаратында куруучу болуп иштеп жатышканы такталды. Алар "Омас" маркетине суусундук алууга барган учурда 2 бала (18 жаштагы А.С. жана Н.А.) менен урушуп кетишкен.
