Ленин округунда кайра шайлоо өтөт. Талапкерлердин арыздарын кабыл алуу аяктады

№ 26 Ленин бир мандаттуу шайлоо округу боюнча Жогорку Кеңештин депутаттыгына талапкерлерди көрсөтүү аяктады.

Тема боюнча:

Ленин округу боюнча кайра шайлоо. 34 адам талапкерлигин көрсөттү

БШКдан билдиришендей, 10-август саат 00:00гө карата 34 талапкер (28 – эркек, 6 – аял) көрсөтүлдү. Кабыл алуунун акыркы күнү 4 талапкерден арыз түштү.

Конституциялык мыйзамдын 61-беренесинин 1-бөлүгүнө ылайык, № 26 Ленин бир мандаттуу шайлоо округу боюнча ЖК депутаттыгына талапкерлерди каттоо үчүн талапкер же анын ыйгарым укуктуу өкүлү 13-август саат 18:00гө чейин төмөнкү документтердин толук пакетин БШКга тапшыруу керек:

• өмүр баянын жана башка маалыматтарды көрсөтүү менен бекитилген формага ылайык, талапкер жөнүндө маалыматтарды;
• паспортунун көчүрмөсүн;
• жогорку кесиптик билим жөнүндө документтин нотариалдык түрдө күбөлөндүрүлгөн көчүрмөсүн;
• иштеген же окуган жеринен маалымдаманы;
• бекитилген формага ылайык, башка мамлекеттин жарандыгы жок экендиги жөнүндө маалыматтарды;
• жекече маалыматтарын иштетүүгө жазуу жүзүндө макулдугун;
• шайлоо күрөөсүн төккөндүгүн ырастоочу документти.

Конституциялык мыйзамдын 23-беренесинин 1-бѳлүгүнѳ ылайык, бардык талапкерлерди каттоо мѳѳнѳтү аяктаган күндѳн тартып шайлоо алдындагы үгүт жүргүзүү башталат - 2023-жылдын 8-21-августуна чейин. Кайра шайлоо 10-сентябрда өтөт.