Кызамыктан 1 жана 3 жашар балдар каза болду
Кыргызстанда кызамыктан эки бала каза болду. Бул маалыматты Саламаттыкты сактоо министрлигинин басма сөз кызматы тастыктады.
Мекеменин маалыматына караганда, оорунун күчөп кетишинен улам эки өлүм катталган: Бишкекте (үч жашар бала) жана Чүй облусунда (бир жаштагы бала). Саламаттыкты сактоо министрлигинин маалыматы боюнча, ата-энелер диний көз караштан улам эмдөөдөн баш тарткандыктан, балдар профилактикалык эмдөө графиги боюнча эмдөө алышкан эмес.
Республикалык иммунопрофилактика борборунун маалыматы боюнча, 2023-жылдын башынан бери кызамык оорусу 1704 адамдан аныкталган. "Белгилей кетүүчү нерсе, жаңы төрөлгөн балдарга вирустук гепатит жана кургак учукка каршы профилактикалык эмдөөдөн ата-энелердин баш тартуусу катталууда", - дешет аталган борбордон.
Дарыгерлер эскерткендей, кызамык өтүшүп кетүүсү менен коркунучтуу: өпкөнүн, мээнин, көздүн сезгениши өрчүп, сокурдукка алып келет. Курчуп кетсе өлүмгө алып келиши мүмкүн.
Кызамыкка каршы вакцина балага 12 айында, ревакцинация 6 жашында жүргүзүлөт.
Башкы беттеги сүрөт иллюстрациялык: 123RF/sypailovak.
