БШКнын башчысы шайлоо күнү мыйзам бузуулар боюнча билдирүүлөр түшкөнүн маалымдады
Ленин району боюнча Жогорку Кеңештин депутатын шайлоо боюнча добуш берүүнүн жыйынтыгы боюнча өткөн брифингде Борбордук шайлоо комиссиясынын төрайымы Нуржан Шайлдабекова шайлоо күнү добуш берүүгө даярдык көрүү жана өткөрүү процессинде мыйзамды бузуу тууралуу билдирүүлөрдү алуу улантылып жатканын айтты.
Ал кошумчалагандай, БШК өз компетенциясынын чегинде добуш берүү күнүнө чейин келип түшкөн бардык арыздар боюнча тиешелүү чараларды көргөн.
"Укук коргоо органдарынын кароосунда турган бир катар материалдар бар. Алардын 14ү бар. Укук коргоо органдарынын кароосунун жыйынтыгы боюнча кошумча маалымат берилет", - деди БШК жетекчиси.
Эске сала кетсек, 10-сентябрда Бишкек шаарында Жогорку Кеңештин Ленин району боюнча депутаттыгына мөөнөтүнөн мурда шайлоо өтүп жатат. Алдын ала маалыматтар боюнча, бул шайлоодо Кубанычбек Самаков алдыда келе жатат.
