Опузалоого шектелип, издөөгө алынган милиция кызматкерлери кармалды
Буга чейин пара талап кылууга шектелип, издөөгө алынган Ош ШИИБдин 3 кызматкери кармалды. Мындай маалыматты УКМКдан билдиришти.
Коопсуздук комитети тарабынан укук коргоо органдарындагы коррупциялык кылмыштарды аныктоо, алдын алуу жана бөгөт коюу боюнча көрүлгөн иш-чаранын жүрүшүндө Ош облусунун тургунунан опузалап 400 миң сом өлчөмүндө акча талап кылган ыкчам кызматкер кармалган. Текшерүүдө Ош ШИИБдин ыкчам кызматкерлери - милициянын капитаны Т.Б.Н., милициянын майору И.И.И., милициянын капитаны Э.С.Э. жана милициянын майору Ж. уулу Н. кылмыш жоопкерчилигине тартабыз деп коркутуу жолу менен А.уулу С`дан 400 миң сом өлчөмүндө акча каражатын опузалаганы аныкталган.
26-сентябрда 100 миң сом алып жаткан жеринен Ош ШИИБдин ыкчам кызматкери, Ж. уулу Н. кармалган. Ал тергөө абагына киргизилип, анын шериктери издөөгө алынган.
