Кара-Суу жана "Дордой" базарларынын соодагерлери ККМден бошотулат
Ош облусунун Кара-Суу шаарындагы базардын жана "Дордой" базарынын ишкерлери кассалык аппараттарды колдонуу милдетинен бошотулат. Бул тууралуу Мамлекеттик салык кызматынын басма сөз кызматы кабарлады.
Белгилесек, бүгүн, 29-ноябрда Оштогу Кара-Суу базарынын ишкерлери митингге чыгышкан.
"Митингдин катышуучулары менен түшүндүрүү иштери жүргүзүлүп, нааразычылыкка чыккандар учурда иштерин улантууда. Кара-Суу соода жайынын аймагындагы бардык базарлардын ишкерлери жана оюн-зоок борбору кассалык аппараттарды колдонуу милдетинен бошотулат", - дешет Салык кызматынан.
Салык мыйзамдарына ылайык, стратегиялык объектилерге кирген базарларда иш алып барган ишкерлер атайын салык режиминде иш жүргүзө алышат. Мындай объектилерге "Дордой" базары (Бишкек) жана Тураталы эл базары (Кара-Суу) кирет.
2024-жылдын 1-январынан тарта алар өзгөчө режимдик зонанын ичинде товарларды сатууда контролдук-кассалык машиналарды, ЭСФ (электрондук эсеп фактурасы) жана ЭТТН (товардын транспорттук коштомо кагазы) колдонуудан бошотулат.
Атайын салык режими - киреше салыгын, сатуудан алынуучу салыкты, кошумча наркка салыкты алмаштырат жана акциздик товарларды жана атайын лицензияларды же уруксаттарды талап кылган товарларды кошпогондо, товарларды сатууга карата колдонулат.
