Башы менен гол жаратып. Президент кантип Мурас турниринин жеңүүчүсү болду
Садыр Жапаровдун командасы футзал боюнча "Мурас" турниринин жеңүүчүсү болду. Мелдеш 8-9-декабрь күндөрү Бишкектеги "Газпром балдар үчүн" спорттук-эс алуу борборунда өттү.
Финалдык беттеште президенттин командасы дарыгерлердин "Ден-соолук" командасы менен жолугушту.
Бул беттеште эсепти биринчи таймда Жапаров ачып, атаандаштарына башы менен сокку узатты - 1:0. Бир нече мүнөттөн кийин ал экинчи голду киргизип, дубль жаратты. Саламаттыкты сактоо министри Алымкадыр Бейшеналиев баштаган башкы дарыгерлер беттештин жыйынтыгында бир голду кайтарып алышып, оюндун соңу 2:1 эсебинде президенттин командасынын пайдасына чечилди.
Үчүнчү орун үчүн болгон беттеште Кыргыз Республикасынын элдеринин ассамблеясынын өкүлдөрүнөн жана диаспора жетекчилеринен куралган "Достук" командасы спорт жылдыздарын жеңип, коло байгеге ээ болушту.
Белгилей кетсек, Жапаров бул турнирде ар бир беттеште гол киргизип, жалпысынан алты беттеш өткөрдү.
Эскерте кетсек, турнир эки күнгө созулду. Биринчи күнү тайпалык баскычтын оюндары өтүп, анда төрт тайпадагы 16 команда плей-оффко чыгуу үчүн ат салышты.
Мелдешке спорттун жылдыздары, спорт федерацияларынын, бизнестин өкүлдөрү, дарыгерлер, мектеп директорлору, журналисттер, Жогорку Кеңештин депутаттары, облустук бийлик органдарынын, сот органдарынын жетекчилери, күч түзүмдөрүнүн жетекчилери сындуу командалар катышты.
