Адахан Мадумаров каза болду деген маалыматты жакыны төгүндөдү
Жогорку Кеңештин депутаты Адахан Мадумаровдун сүрөтүн колдонуу менен аны каза болду деген маалымат жарыяланды. Сүрөттө депутат 31-январда каза болгону жазылган.
Бул маалыматты депутаттын жээни, ырчы KG Эльмурат (Калыбеков) четке кагып, Kaktus.kg сайтына буларды билдирди.
"31-январда интернетке сүрөт тарагандан кийин СИЗОго барып кабар алдым. Өзү менен жолуктурушкан жок. Бирок аман-эсен, ден соолугу да канааттандырарлык экенине ынангандан кийин кеттим. Тарап жаткан билдирүү жалган", - деп жарандарды ишенбөөгө чакырды.
Белгилесек, "Бүтүн Кыргызстан" партиясынын лидери Адахан Мадумаров былтыр 2-сентябрда камакка алынган. Ага 2009-жылдагы протоколго ылайык, КР Кылмыш-жаза кодексинин "Мамлекетке чыккынчылык" беренеси боюнча айып тагылган. Сот депутатты эки айга камакта калтырган.
Кийин 2015-жылдагы парламенттик шайлоого байланыштуу депутаттын дарегине арыз жазылган. Ал "Бүтүн Кыргызстан" партиясынын кассасынан 50 миң доллар алган деп айыпталган. Андан бери депутат камакта.
