ЖЭБдеги аварияда жабыркаган бейтаптардын экөө Түркияга которулат
Бишкек ЖЭБдеги авариядан жабыркаган бейтаптардын экөө Түркиядагы адистештирилген клиникага которулат. Мындай маалыматты Саламаттыкты сактоо министрлигинен билдиришти.
Белгилүү болгондой, бүгүн, 3-февралда Түркиянын "Голджук" ооруканасынын эки реаниматолог дарыгери Кыргызстанга учуп келди.
Дарыгерлер Этем Өзтүрк жана Энгин Четин саламаттыкты сактоо министри Алымкадыр Бейшеналиев менен биргеликте жабыркагандардын абалы менен таанышып, бейтаптарды дарылоо тактикасын жана дайындалган дарылоону карап чыгышты.
Жыйынтыгы менен дарыгерлердин кеңешмесин өтүп, Этем Өзтүрк эки бейтаптын абалы оор экенин, бирок алар реакция билдирип, суроолорго жооп берип жатканын белгиледи.
Кеңешменин жыйынтыгында эки жабырлануучуну андан ары дарылоо үчүн Түркиядагы адистештирилген клиникага которуу чечими кабыл алынды.
*****
Энергетика министрлиги Бишкек ЖЭБдеги авария 2-февралда саат 03:00 чамасында катталганын расмий маалымдады. Кырсыктан улам чыккан өрт саат 04:55те чектөөгө алынып, саат 05:05те толук өчүрүлдү.
Кырсыктан 5 адам жабыркап, экөө амбулатордук дарыланууга жөнөтүлсө, экөө оор абалда реанимацияда жатканы белгилүү болду. Дагы бир бейтаптын абалы орто оор деп бааланууда.
