Тажикстан кыргызстандыктардын балдарын бербей койду. Бул окуянын аягы эмне болду?

Васильевка айылынын тургуну Суни Шералиев Тажикстандан балдарын алып чыга албай калган үй-бүлөнүн окуясын Kaktus.media редакциясына айтып берди.

Мындан мурун, тажик тарап, аскер конфликти учурунда Тажикстандан кайтып келаткан Кыргызстандын жарандарынын балдарын алып калды, деген маалымат тараган. Тажикстан бул кадамын ата-эненин жарандыгы Кыргызстандыкы болгону менен балдардын туулгандыгы тууралуу күбөлүктөрү Тажикстандан алынган, демек алар Тажикстандын жараны, деп түшүндүргөн. Балдарды балдар үйүнө өткөрүшөт, деген маалымат да чыккан.

Ата-эне Бишкекке келээри менен ТИМге жана журналисттерге кайрылып, жардам сурашкан. Шералиевдин айтымында, бүгүнкү күндө маселе чечилди.

"Бул адамдар Тажикстандан Кыргызстанга бир нече жыл мурун көчүп келип, жарандыгын алмаштырышкан. Келгенден бери Чүй облусунда жашашат. Пандемия башталганда балдары менен Жерге-Талга, ата-энесиникине, кетишкен. Конфликт башталганда кайра Кыргызстанга кайтып келатканында өздөрүн чек арадан өткөрүп, балдардын жарандыгы Тажикстандыкы деген шылтоо менен чыгарбай коюшат. Балдарды балдар үйүнө өткөрүп салабыз, деп коркутушкан экен. Бирок, белгилүү болгондой, аларды чоң ата-чоң энесиникине жеткирип коюшуптур. Ата-эне Бишкекке келип, ТИМге жана журналисттерге кайрылып, жардам сурашкан. ТИМ менен элчилик тажик тарап менен сүйлөшүүлөрдү жүргүзүп, балдарды каалаган учурда алып чыгуу уруксатын алышкан. Бирок балдардын чоң аталары азырынча алып кетпей туруусун суранышкан", - деп Шералиев айтып берди.

• 28-апрелде кыргыз-тажик чек арасындагы кырдаал курчуй баштаган.
• 29-апрелде конфликт уланып, бир нече айылда өзгөчө кырдаал киргизилип, жергиликтүү калк эвакуацияланган.
• Кыргызстан менен Тажикстандын Тышкы иштер министрликтери 29-апрелде, саат 20:00дон тартып ок атышууну токтотуу боюнча макулдашышты.
• 30-апрелде эртең менен кайрадан ок атышуунун добуштары угула баштады.
• 30-апрелде, саат 16:00до сүйлөшүүлөрдүн натыйжасында бардык айылдар бошотулат, деп Камчыбек Ташиев билдирди.
• 30-апрелден 1-майга караган түн тынч өттү.
• Кыргызстанда 1-2 май күндөрү аза күтүү күндөрү болуп жарыяланды.
• Лейлек районунда кайрадан ок атыла баштады. Ворухка караган жол тажик аскерлери тарабынан жабылды. Арка айылында жергиликтүү калктын үйлөрүнө ок атылууда.
• 1-майда, кечки саат 18:00до эки өлкөнүн делегацияларынын жетекчилери аскер түзүмдөрүн туруктуу дислокациясына чыгарып, ок атууну токтотуу чечимин кабыл алганы белгилүү болду. Андан тышкары, барымтага алынган 10 киши кое берилди, анын ичинде Интернационал айылынын башчысы дагы.
• 1-майдан 2-майга карган түн тынч өттү.
• КРдин өкмөтү Баткен облусуна өзгөчо статус берүү үчүн документтерди даярдап жатышат.
• Ташиев Кыргызстан Тажикстандан келтирген материалдык кесепеттин ордун толтурууну талап кылбай тургандыгын билдирди.
• Көз карандысыз юристтер Эл аралык кылмыш сотуна кайрылуу үчүн документтерди чогултуп жатышат
• 3-майга карата каза болгондордун саны 36 киши.