Сириядан кайтарылган келин Оштогу тергөө абагына киргизилген. Ал акыйкатчыга кайрылды
Акыйкатчынын орун басары Жанибек Жоробаев жана акыйкатчынын Ош облусундагы өкүлчүлүгүнүн кызматкерлери Ош шаарындагы №5 тергөө абагынын, ошондой эле улгайган адамдар үчүн жатак интернатта жарандардын укуктарынын сакталышына мониторинг жүргүздү.
Андан тышкары 40 жаштагы аял укуктарын коргоону суранды. Ал 2023-жылдын октябрында өкмөттүн программасынын негизинде Сириядан 3 баласы менен кайтарылган. Айтымында, ал реабилитациялык процедуралардан өткөн. Ошого карабастан укук коргоо органдары тарабынан 2024-жылы мартында кармалган. 7-мартта Кара-Суу райондук соту 7-апрелге чейин камакка алуу баш коргоо чарасын кабыл алган.
Укук коргоо органдарынын маалыматы боюнча, келин Кылмыш-жаза кодексинин 375-беренеси "Жалданмачылык" (1997-жылдагы редакция) боюнча мурда козголгон кылмыш иши боюнча кармалган.
Аялдын кайрылуусун акыйкатчынын орун басары өз көзөмөлүнө алды.
Акыйкатчы институту берген маалыматта тергөө абагында учурда 291 адам кармалып турат. Алардын ичинен 12си аял. Ошондой эле 2 адам өмүр бою эркинен ажыратылган. Тергөө абагы 511 адамга эсептелген.
