Бишкектин 34 мектебинде коронавирус инфекциясын жугузуп алуу катталды
12-майга карата Бишкекте 158 киши коронавирус инфекциясын жугузуп алганы аныкталды, анын ичинен 148и лабораториялык жактан тастыкталган, 11 - пневмония. Бул тууралуу борборубуздун мэриясындагы брифинг учурунда Мамлекеттик санитардык-эпидемиологиялык көзөмөлдөө борборунун башкы дарыгеринин орун басары Айнагүл Рыскулова билдирди.
Ал эми билим берүү башкармалыгынын башкы адиси Чынара Исакова шаардагы 97 мектептин ичинен 34 мектепте COVID-19 жана пневмония учурлары катталганын айтып берди. 13 мектеп карантинге жабылды, 21 мектепте 36 класс карантинге жөнөтүлдү. Окуучулар онлайн режимде окуусун улантууда.
Адистин айтымында, 2 627 окуучу ата-эненин арызы боюнча үйдөн окуп жатышат.
Билим берүү мекемесинин 47 кызматкери коронавирустук инфекциясын жугузган, анын ичинен 9да пневмония. 90 мектеп окуучусунда коронавирус аныкталып, 11-пневмония менен ооруп жатат. 47 мугалим жана 3 331 окуучу грипптен дарыланууда.
"89 муниципалдык балдар бакчасынан бешөө жабык. Алты кызматкер COVID-19 менен ооруп жатат", - деп Исакова билдирди.
