Дайырбек Орунбеков алтынга окшош куймалары бар видеого комментарий берди
Президенттин маалымат кызматынын жетекчиси Дайырбек Осмонов социалдык тармактарда тараган видео боюнча комментарий берди. Бул видеодо көшөгө артында турган белгисиз адам алтынга окшош куймаларды көрсөтүп жатат.
Орунбековдун айтымында, активист Асхат Осмонов бул видеону социалдык тармактарга тарата баштаган. Орунбеков, буга чейин Осмонов Райымбек Матраимовдун атынан кат жарыялаган. Ал анда 2020-жылдагы октябрь окуясында Садыр Жапаровго 3 миллион доллар которгон деп айтылган. Кийинчерээк Матраимовдун жакындары бул катты жасалма деп аташкан.
"Бул сапар жасалма алтын куймаларды кагаз коробкага тизип алып монтаждап чыгарыптыр. Жасалма кагаз акчалар, алтын куймаларга окшош оюнчуктар болот. Асхат Осмонов деген шылуун алыста жүрүп зээриксе керек, оюна келген калптарды мезгил-мезгили менен чыгарып турат. Алтын оор болот, куймаларды кагаз коробка кантип көтөрмөк эле?! Анын сабатсыздыгы так ушул жерден билинип калыптыр.
Бул жаран 2020-жылы "Чоң-Казат" кыймылынын курамында болуп, бийликке келүүгө аракет кылган. Максаты ишке ашпаган соң, ар кандай жалган маалыматтарды таратып, кийин Америкага чыгып кеткен. Азыр уктаса-турса бийликтин кетишин кыялданып, бузукулук менен жалган маалыматтарды таратып коюп отурат.
Андыктан мындай чагымчыл фейк маалыматтарга ишенбөөгө чакырабыз. Кумтөрдүн алтыны 1 граммына чейин катуу көзөмөлдө, Улуттук Банкта сакталып турат. Аны коробкага салып ары бери ташыгандай кампадагы картошка эмес да", - деп жазды ал.
Эскерте кетсек, аталган видео 7-майда социалдык тармактарда тарап, бир аздан соң иликтөөчү журналист Болот Темиров өзүнүн Темиров Live YouTube каналына бул видеодогу маалыматтарды талдап чыккан материалды жарыялаган.
Улуттук коопсуздук боюнча мамлекеттик комитет алтын сымал куймалар тартылган видеону чындыкка коошпойт деди. Мамкомитеттин маалыматы боюнча, видео мурда оор жана өзгөчө оор кылмыштарды жасагандыгы үчүн кылмыш иши козголгон адамдар тарабынан даярдалган.
"Учурда деструктивдүү күчтөр социалдык тармактарда жалган маалыматтарды таратууга багытталган максаттуу маалыматтык иштерди жүргүзүүдө, анын максаты – Кыргыз Республикасынын саясий жетекчилигине карата коомдук терс пикирди жаратууга багытталган. Деструктивдүү күчтөрдүн мындай аракеттери потенциалдуу коркунучтарды жаратат. Республиканын стабилдүүлүгүнө жана прогрессивдүү өнүгүшүнө, ошондой эле коомдук-саясий кырдаалдын курчушуна алып келип, мамлекеттин коопсуздугуна зыян келтириши мүмкүн", - деп айтылат мамлекеттик комитеттин билдирүүсүндө.
Асхат Осмонов тууралуу эмне белгилүү?
Юридикалык билими бар, көп жылдар бою нотариус, Тышкы иштер министрлигинде жардамчы болуп иштеген, ишкерлик менен алектенген, "LUK Electric" компаниясынын Кыргызстандагы өкүлү болгон. Оsoo.kg сайты билдиргендей, ал "Роял металлс" компаниясына ээ.
Осмонов 2020-жылы "Чоң Казат" партиясынан шайлоого катышкан. Партиялык тизмеде ал жумушсуз катары жазылып, №15 талапкер болгон.
2020-жылдын декабрь айында бийлик алмашкандан кийин бардык мамлекеттик органдарда жана администрацияларда кадрдык өзгөрүүлөр болду. Ошондо Осмонов мэр болгусу келгендердин бири болгон. Бир канча убакыт өткөндөн кийин ал ойдон кайтып, мэрдин кеңешчиси кызматына ээ болгон. Ал убакта шаарынын мэри Балбак Түлөбаев болуп турган. 2021-жылдын апрель айында Осмонов бул кызматтан кеткен. Осмоновдун мындан кийин эмне кылганы жана ага карата кылмыш иши козголбогону тууралуу ачык булактарда маалымат жок.
