Улуу Британияда сезондук жумушчулар үчүн курактык чектөөлөр барбы? Эксперттин жообу
Кыргызстандыктар Улуу Британияга Эмгек министрлигине караштуу Чет өлкөдө жарандарды ишке орноштуруу борбору аркылуу белгилүү бир жашка чейин гана сезондук жумушка бара алышат. Бул тууралуу борбордун директору Бакыт Кудайбердиев "Биринчи радионун" эфиринде билдирди.
Ал белгилегендей, Улуу Британияда 3 миңден ашык фермер кыргызстандыктарды кулпунай жана малина чогултуу менен байланышкан айыл чарба иштерине атайын тартат. "Чындыгында, биздин жарандар келип, көнүп калганга чейин бир жарым айдай убакыт кетет. Андан кийин бир топ жеңил болот", - деди ал.
Кудайбердиев кошумчалагандай, өлкөлөр ортосундагы келишимдерге жана программалардын шарттарына ылайык, эмгек мигранттарынын жаш чегин айрым мамлекеттер белгилейт. Алардын катарына Улуу Британияны кирет.
"Улуу Британия 45 жашты чектегенине карабастан, программанын алгачкы жылдарында, 2021 жана 2022-жылдары 50 жаштан ашпагандар кетишти", - деди ал.
Кудайбердиевдин айтымында, Түштүк Кореяга Эмгек министрлигине караштуу Чет өлкөдө жарандарды ишке орноштуруу борбору аркылуу иштөөгө да баруу белгилүү бир куракка – 39 жашка чейин гана мүмкүн.
