"Портер" окуучуларды сүзүп кеткен окуяны иликтеген комиссиянын иши аягына чыкты
Жалал-Абад облусунун Сузак районунда окуучулардын катышуусундагы кырсыктын чоо-жайын иликтөө боюнча ведомстволор аралык комиссиянын иши аягына чыкты. Бул туурасында президенттин администрациясынан маалымдашты.
Садыр Жапаровдун тапшырмасы 2-майда Сузак районунун Жерге-Тал айылында "Урааным Манас" аттуу маданий иш-чарасы учурунда катталган окуянын келип чыгуу себептерин иликтөө боюнча ведомстволор аралык комиссия түзүлгөн. Комиссиянын корутундусунда бул иш-чаранын уюштуруучулары катышуучулардын коопсуздугун камсыздоо боюнча зарыл чараларды көрбөгөндүгү белгиленген. Атап айтканда:
- Облустук, ошондой эле райондук ички иштер органдарынын жетекчилери тарабынан жүктөлгөн милдеттерди аткарууга тийиштүү мамиле жасалбагандыгына жол берилген.
- Билим берүү мекемелеринин жооптуу адамдары райондук жана облустук администрациялар менен өз ара аракеттенүүнү жана маалымат алмашууну талаптагыдай жүргүзбөгөндүгү да аныкталган.
- Жергиликтүү өз алдынча башкаруу органдарынын жетекчилери "Урааным Манас" сынагын өткөрүүнүн конкреттүү датасы жөнүндө кабардар болбогон деген сыяктуу айрым фактылар белгиленген.
- Иш-чараны уюштуруу маселелери 1-майдан 5-майга чейинки күндөр расмий эс алуу күндөрү болгону үчүн татаалдашкан.
- Сузак райондук мамлекеттик администрациясы акциянын датасы тууралуу чечимди үстүртөн - телефон аркылуу тараткан.
- Иш-чарага райондогу 2878 окуучу жана 18 мектептин 341 мугалими катышкан. Ошол эле учурда жол кыймылынын коопсуздугун камсыздоо максатында эки гана жол коопсуздугун камсыздоо инспектору тартылган.
Окуянын чоо-жайын иликтөөнүн жыйынтыгы боюнча ведомстволор аралык комиссия тарабынан тартиптик жаза жарыялоо, ошондой эле тармактык министрликтердин жана жергиликтүү өз алдынча башкаруу органдарынын жетекчилерин жана кызматкерлерин ээлеген кызматтарынан бошотуу сунушталды.
Бардыгы болуп тартиптик жоопкерчиликке 21 кызматкер тартылды, анын ичинен 6 адам ээлеген кызматынан бошотууга көрсөтүлдү.
