Аламүдүндө 2 жылдан бери мыйзамсыз иштеген медресе аныкталды
Чүйдүн Аламүдүн районундагы Васильевка айыл аймагында мыйзамсыз иштеп жаткан медресенин ишмердүүлүгүнө бөгөт коюлду. Коопсуздук комитеттин маалыматына караганда, медресе 2 жылдан бери мыйзамсыз ишмердүүлүк жүргүзгөн.
Кабарлангандай, жүргүзүлүп жаткан ыкчам иликтөө иштеринин жүрүшүндө медресе диний ишмердүүлүктү дин иштери боюнча ыйгарым укуктуу органдардан каттоодон өткөрбөй жүргүзгөн.
УКМК аталган медресенин ишмердүүлүгү боюнча ведомстволор аралык (УКМК, ИИМ, Дин иштери боюнча мамлекеттик комиссия, Санитардык-эпидемиологиялык борбор) жумушчу комиссия тарабынан комплекстүү текшерүү демилгесин көтөргөн. Жыйынтыгында мыйзам бузуу аркылуу дин жана билим берүү тармагында архитектуралык-курулуш жана санитардык-гигиеналык нормаларды бузуу катталган.
Аталган медресени салттуу эмес диний агымдардын биринин жетекчисинин тууганы Ж.У. уюштуруп, 2022-жылдан бери мыйзамсыз иштеп келгени такталды. Текшерүү учурунда медреседе атайын окуу программасы жок, жашы жете элек 33 бала билим алып жаткандыгы аныкталды.
Текшерүүнүн жыйынтыгы менен тергөөгө чейинки иликтөө иштери жүрүп, медресеге мөөр басылып, окуучулар ата-энелерине өткөрүлдү.
