Ысык-Көлдө Бишкектен чыгып баратканда жол эрежесин бузган айдоочулар токтотулуп жатат
Бишкектен же борбордон чыгып баратканда жол эрежесин бузган айдоочулар Ысык-Көлгө кирер алдында токтотулат. Жол кыймылынын коопсуздугун камсыздоо боюнча мамлекеттик инспекциясынын басма сөз кызматы билдиргендей, аталган башкармалык буга чейин жарандардын кайрылууларын түз кабыл алуу үчүн 0 777 102 102 WhatsApp номурун ишке киргизген.
"Бул ишенимдүү номурга Бишкек шаарынан Ысык-Көл облусуна бара жаткан кичи автобустардын жүргүнчүлөрү айдоочунун эреже бузганда: ылдамдыкты жогорулатуу, каршы тилкеге чыгуу, жүргүнчүлөрдүн өмүрүнө коркунуч туудурган, туура эмес түшүрүү жана жүргүнчүлөрдү алуу жерлерин ошондой эле техникалык бузулууларды чагылдырган фото жана видеотасмаларды жөнөтүшкөн.
Эреже бузган айдоочуларга тиешелүү чараларды көрүү үчүн транспорттук ишмердүүлүктү жөнгө салуу жана лицензиялоо бөлүмү жана Мамлекеттик жол кыймылынын коопсуздугун камсыздоо инспекциясынын кызматкерлери тарабынан рейддер өткөрүлдү. Ысык-Көл облусуна кире бериште жол эрежесин бузган айдоочулар токтотулду", - деп билдиришти башкармалыктан.
Текшерүүнүн жыйынтыгында эрежени одоно бузуу, техникалык кароодон өтпөө жана лицензиялык талаптарды аткарбагандыгы үчүн 28 протокол түзүлүп, жалпы суммасы 135 000 сом айып салынган.
