Ноокатта сел алып кеткен эки баланын жансыз денеси табылды
Ноокат районунда сел алып кеткен эки баланын сөөгү табылды. ӨКМдан билдиришкендей, Абшыр-Ата айылында сел суусуна агып кеткен 2 эркек баланын (туулган жылы жана аты жөнү такталууда) сөөгүн куткаруучулар таап, милиция кызматкерлерине өткөрүштү.
"Белгилей кетсек, алдын ала маалымат боюнча кечээ 6 адам агып кеткен. 28-июнда 4, бүгүн 2 баланын сөөгү табылган. Учурда тактоо иштери жүрүүдө", - дешет мекемеден.
Ош облустук ички иштер башкы башкармалыгы бул маалыматты тастыктады. Башкармалыктан билдиришкендей, издөө иш-чараларынын натыйжасында буга чейин 4 жарандын жансыз денеси ӨКМ тарабынан табылган. Алар - Ноокат районунун 2005-жылы туулган К.Б., 2008-жылы туулган М.Б. жана С.кызы А., жана М.кызы А. (туулган жылдары тактала элек) экендиги аныкталган.
Буга чейин Өзгөчө кырдаалдар министрлигинин басма сөз кызматы селден 5 адам каза болуп, дагы экөө дайынсыз болуп жатканын билдирген. Ведомствонун маалыматы боюнча, 28-июнда кечке жуук сөөрүдө отурган 7 адамды сел суулары агызып кеткен. Каза болгондордун баары жергиликтүү тургундар. Алардын бири 2005-жылы туулган К.Б., дагы бири 2008-жылы туулган М.Б. болгон. Калгандарынын аты-жөнү такталып жатканы кабарланган.
Бейрасмий маалыматтар боюнча каза болгондордун саны он кишиге жеткен, азырынча мекеме каза болгондор тууралуу маалыматка өзгөртүүлөрдү киргизүүдө.
Белгилесек, 28-июнда нөшөрлүү жаандан улам өлкөнүн бир катар аймактарында, анын ичинде Ноокатта катуу сел жүрүп кыйроолорго, жоготууларга алып келди.
Селдин кесепетинен Кызыл-Кыя шаарынан Абшыр-Атага бараткан жолду сел алып кетип, суунун аркы бетинде кеминде 1300 адам өтө албай калганы кабарлаган.
